السلام عليكم ورحمة الله وبركاته :
هذا الدرس خاص للمتقدمين فقط ؛ المبتداين سوفوا يجدوا الكثير من المشاكل
كذلك يجب ان تكون علي دراية ولو بسيطة ب network
اخواني الكرام اول درس تعلمنها في هذا المنتدي الجميل انه لا يوجد مستحيل
بل يوجد محاولة و اصرار وتحقيق نتائج بفضل الله تعالي
اليوم اقدم لكم شرح لبرنامج صغير يقوم باعمال كبيرة
انا شخصيا تعبت جدا علشان اوصل للنتائج دي _ المهم الحمد لله وصلنا
من خلال هذا البرنامج نقدر نربط بين البرامج عن طريق الانترنت
ايوة ده الوقت تقدر تربط بين فروع شركتك كلها عن طريق الانترنت
تقدر تعرف فرع الاسكندرية حتي هذه اللحظة رصيده ومبيعاته كام ؟؟؟
تعرف الفرع اللي موجود في جده حالا بايع بمبلغ كام ؛ ومين الموظفين اللي دخلوا الشركة
ده انت ممكن تبعت امر طباعة من الرياض والورقة تتطبع في جده :D
طيب والله ممكن وببلاش من خلال هذا الدرس ؛ بس انت صحصح وربنا يسهل
ندخل في الموضوع :
الاول كده علشان نبقي علي نور صلي علي النبي
طيب كمان زيد النبي صلي
طول منا شغال حضرب امثاله علي الجهازين اللي موجودين عندنا
الاول : سيرفر
الثاني : جهاز رقم اتنين
المتطلبات :
1- تحميل هذا البرنامج من خلال هذا اللينك
http://files.hamachi.cc/hamachisetup-1.0.2.2-en.exe
( وياريت لو المشرفين الجمال يرفعوا لينا الملف هنا خوفا من الضياع ) تم رفع الملف بناء على طلبك - أختكم زهره
2- ويندوز xp لاني مع الاسف معنديش وقت كافي علشان اجربه علي انظمة تشغيل اخري
3- مع العلم انا جربته مع ويندوز 2000 وكانت النتيجة فشل بدرجة امتياز _ ومش عارف العيب فيه ولا فيه
4- وجود انترنت ويفضل طبعا DSL ويجب الا تقل السرعه في كل الاحوال عن 128 K
انا جربته مع 256 وشغال معتدل __ هو فيه طبعا نسبة بطئ بس احسن كتير من الاول
علي الاقل ده الوقت بشوف بيانات _ كان حلم عمري والله قرابت الشهرين :D
5- اغلاق ال FIREWALL ونكرر مرارا وتكرارا اغلاق ال FIREWALL
جابلي شلل نسيته مفتوح وتقريبا جالي سكته قلبيه مرتين بسببه اوعي تنساه وتفتحه
ولو عندك انترنت سكيورتي ياريت لو تقفله او تشيله يبقي احسن :D
6- وجود جهازين في مكانين متباعدين حتي تسطتيع ان تري النتائج
7- انشاء مجلدعلي جهاز السيرفر وعمل مشاركة لهذا المجلد وجعل الصلاحيات للجميع ؛ اذا كانت دي اول مرة تعمل مجلد مشترك الويندوز حيطلب منك تاكيد مشاركة مجلد انت وافق ومتخافش عندك قلب عندك حظ ؛؛؛؛ ويجب ان يكون هذا المجلد علي الجهاز الذي ستوجد به قاعدة البيانات ؛ أي الجهاز المعتبر السيرفر
8- فتح حساب الزائرين guest في الجهاز المعتبر السيرفر من خلال حسابات المستخدمين
طريقة الاعداد :
تأكد اولا انك متصل بالانترنت ضروري النقطة دي
وبعدين قم بتشتغل البرنامج اللي حملته واعمل ليه اعداد وسهل جدا اعداده
الخطوة الوحيدة المطلوبة منك في الاعداد اختار اول اختيار وهو Free المجاني
جميل الكلام
بعد لما تعمل ليه اعداد حيحاول البرنامج يبحث عن أي بي خاص بيه
وللعلم لا تقوم بكتابة الاي بي ؛ بل يجب ان يكون اتوماتك
وسوف بقوم البرنامج باخد أي بي عن طريق الموقع الخاص بالبرنامج
بعد كده احتمال تلاقي علامة الاتصال غير ظاهرة بجوار الساعه
يمكنك اظهارها من خلال مواضع شبكة الاتصال My Network Places
حتلاقي اسم الاتصال Hamachi يمكنك الضغط كليك يمين واختيار اظهار عند الاتصال
جميل كده ؟؟؟؟؟؟ باذن الله جميل
اذهب الي ايكون البرنامج الموجود بجوار الساعه واضغط عليه لفتحه
حتلاقي شكله قريب شوية من الماسينجر وموجود في اسفل الشاشة السوداء 3 ازرار
اول زر من ناحية اليمين وهو اعداد البرنامج ( وانصح بعدم اللعب وخصوصا للمبتدائين )
الزر الاوسط وهو انشاء اتصال او المشاركة في اتصال ( هو ده الشغل يا معلم )
اضغط علي هذا الزر
طبعا علي افتراض انك حتنزل البرنامج ده علي السيرفر اللي موجود عليه قاعدة البيانات
يبقي لازم تعمل شبكة جديدة create new network
حيطلب منك انك تختار اسم للشبكة وكلمة مرور خاصة بها
نصيحة الا تحتوي اسم الشبكة علي مسافات وكلمة المرور يجب ان تكون معقدة نوعا ما
جميل الكلام
بعد لما تنشا الشبكة اذهب الي الجهاز الاخر وقوم بنفس الخطوات السابقة عدا الخطوة الاخيرة
بدل من انشاء شبكة لا الربط بشبكة join network
سوف يسالك عن اسم الشبكة وكلمة المرور الخاصة بها
قوم بكتابتها
مبروووووووووووووووووووك تم الاتصال بين الجهازين
الله بس انت مش شايف الاتصال لحد ده الوقت ؟؟؟؟؟
انا اقولك بقا تعرف ازاي
حتلاقي اسم الجهاز التاني موجود اون لاين وبينور وزي الفل اهو
وممكن لو ضغط عليه مرتين حيعمل Ping ولو جاب ليك replay يبقي انت معلم
ولو جاب ليك request يبقي الجهاز غير متصل بالانترنت
جميل الكلام ؟؟؟ طيب
احنا في المطلبات طلبنا من حضرتك انك تعمل مجلد وتعمل ليه مشاركة ؟؟؟؟
جميل الكلام
ضع داخل أي ملفات هذا المجلد
علي افتراض انك قمت بوضع ملفات داخل المجلد الموجود علي السيرفر
وتريد استعراض هذه الملفات من خلال الجهاز رقم اتنين
قم الي الذهاب الي My Network Places مواضع شبكة الاتصال
واختار entire network الدخول الي الشبكة
ثم اختار : microsoft windows network سوف تجد workgroup افتحه سوف تجد جهاز السيرفر
قم بفتحه سوف تجد المجلد المشترك وبه الملفات بالداخل
الف مليون مبروك ( استاهل دعوة حلوه بقا )
يمكنك وضع قاعدة البيانات اذن وعمل الربط مع الشاشات وعيش يا معلم
وبكده نكون وصلنا لحل ربط الفروع المتباعدة مع مركز الادارة
شكرا ليكم واتمني ان اكون وفقت في تقديم ولو معلومة صغيرة الي هذا المنتدي الكبير جدا
واللي انا شخصيا بدين ليه بالكتير والكتير
انا شخصيا اللي مجرب والحمد لله شغال تمام معايا زي الفل _ المشكلة بس في السرعه لازم تكون سرعه الانترنت مرتفعه
شكرا ليكم
وانا تحت امركم في اي استفسار
ومتنسانيش من دعواتك الحلوة
