تعلم تصميم المواقع ...من الصفر للمبتدئين

مرحبا

ممكن اكون اول طالب عندك

لاني فعلا حاب اتعلم

بس ياريت ان نكمل لنصل الى مرحلة متازة

في برمجة المواقع

وشكرا لك كتير

-09

شكرا أخي لمبادرتك تعليم أخوانك تصميم الصفحات

سر على بركة الله وستجد الكثير من الأعضاء يمرون على هذه الدروس ويدعون لك بالخير

ولا تنتظر الشكر من أحد طالما انك تعمل لوجه الله

ابذل مالديك من العلم وانتظر الجوائز على عملك في يوم العرض الاكبر .

و ثق بان الادارة ستذلل كل الصعاب التي تواجهها باذن الله .

===

وانا معكم

ويسعدني أن أكون من المتدربين معكم

أخوك ناصر

توكل على الله وابدأ ...

أهم شي تحققه أن النفع والفائدة التي سيحصلها كل من يتابع تحسب في رصيد الحسنات لديك ..

بارك الله فيك اخي webdesigner على مبادرتك .. فقط اتمنى عليك ان تضع لنا فهرس بالدورس قبلاً (اتمنى ان تتطرق الى المواقع الديناميكية) .. و ان تتطرق الى نشر المواقع بشكل اوسع :rolleyes: بارك الله فيك ..

بنت اليمن ،،

لم اكن اتوقع مثل هذا الاقبال الذي اسعدني كثيرا ...

واعدكم انني سابذل ما استطيع حتي نبدا معا من الصفر وحتي نصل الي محترفين باذن الله

وانتظروا الدرس الاول بعد قليل .. ;)

وشكر خاص للاخ فيصل علي استعداد الادارة للتعاون ..

وهذا يذلل كثيرا من الصعاب ف الطريق

وباذن الله سنصل الي المواقع اليدناميكية .. لا تقلقي ..

ولكن دعينا نصعد السلم من تحت لفوق :)

هناخدها واحدة احدة ان شاء الله ...

الدرس الأول

بسم الله الرحمن الرحيم....

قبل ان نبدا في الحديث عن هذه اللغة هناك بعض المعلومات والمفاهيم التي لابد ان نفهمها جيدا قبل ان نفهم ما هي لغة الhtml..

ارجو ممن يقرا هذه المعلومات اذا كانت اول مرة يسمع عنا ان يقراها مرتين لكي تتضح له الصورة جيدا

يجب ان يعلم كل متعمق في هذا الموضوع اولا ما معني كلمة server وكلمة browser...

دعوني ابدا من الوراء قليلا للتوضيح

ما هو مفهوم شبكة الانترنت بالمعني العلمي؟؟؟

في البداية كان الإنترنت عبارة عن شبكة بسيطة تربط بين أجهزة بعض الطلبة في احدي الجامعات الأمريكية بحيث يمكن لأحدهم رؤية ما علي جهاز الاخر وتصفحه بسهولة..

وكانت تقابلهم مشكلة...ماذا لو ان احدهم اراد تصفح جهاز صديقه ولكن كان جهاز صديقه مغلق في هذا الوقت؟؟

كان لا يستطيع لانه لابد لتبادل المعلومات في الشبكات ان يتم التبادل بين جهازين مفتوحين..

..فما هو الحل في هذه المشكلة وما هو معني الانترنت الان؟؟

للتغلب علي هذه المشكلة وبعد ان تطور استخدام الانترنت واتسع نطاقه بشكل كبير....

لو انا عندي معلومات علي الجهاز بتاعي عايز غيري يقدر يتصفحها ممكن احطها علي جهازي وفي حالة ما ذا كان جهازي مفتوح علطول يبقي أي جهاز متصل بجهازي يقدر يشوف لمعلومات دي ...

ولكن ايضا ماذا لو وصل عدد متصفحين هذه المعلومة في نفس اللحظة الي 10000 مثلا او أي رقم كبير ...هل يتحمل جهازي البسيط بامكاناته المتواصعة كل هذا العدد من المتصفحين في نفس الوقت؟؟؟؟

كل هذه المشاكل كان لابد لها من حل....

من هنا ظهرت كلمة ال server كحل لكل هذه المشاكل....فما معناها؟؟

المعني الحرفي لكلمة server يعني خادم...."خادم الانترنت"

فهو عبارة عن اجهزة ضخمة بامكانيات جبارة تحتمل عدد كبير جدا من المتصفحين في نفس الوقت وتتحمل ان تظل تعمل دائما بلا انقطاع...

فانا لو عندي معلومات اقوم بوضعها علي هذا السيرفر بدلا من تركها علي جهازي فتحل كل المشاكل السابق ذكرها بالاضافة الي ان هذا السيرفر متصل بكل الاجهزة في منظقته فتصبح كل هذه الاجهزة متصلة ببعضها البعض عن طريقة...

ففي كل منطقة يوجد سيرفر خاص بها يربط اجهزتها ببعض ويكون شبكة بينها .....ولكن ماذا اذا اردت تحميل معلومات من علي سيرفر اخر؟؟

ولذلك فان كل السيرفرات متصلة ببعضها البعض في شبكة كبيرة تعرف بشبكة الشبكات وهذا هو الانترنت

"شبكة الشبكات"

..

كيف نطلب معلومات من السيرفر او نستقبل منه معلومات؟؟؟

يوجد بكل جهاز برنامج متصفح للانترنت "browser” اشهرها وافضلها الانترنت اكسبلورر...فهو عبارة عن برنامج مجهز لارسال واستقبال بيانات من السيرفر.....

وهذا ما سندخل اليه أنفا ان شاء الله لمعرفة المزيد عنه....

ارجو ان اكون قد أفدتكم...

ملحوظة : اذا كانت هه المعلومات بدائية بالنسبة لك فلا تتضايق فهناك من لا يعلمها ..

وانا هعمل حسابي الدروس علي اعتبار ان اللي بيقرا ليس لديه اي خبرة سابقة ف مجالات الكمبيوتر

الدرس الثاني ( ما هي لغة ال Html ؟؟ولماذا نتعلمها؟؟) :-

عشان اوضحلكم معني لغة ال HTML اسمحولي اقوللكم مثال بسيط ..

لو انا بكلم واحد من امريكا وعايز اقولله حاجة يعملها ....

لو قلتله الحاجة دي بالانجليزي هيفهمها وينفذها..

لو قلت نفس الحاجة بالعربي مش هيعبرني :)

وفي نفس الوقت ممكن يكون الشخص ده بيعرف اكتر من لغة "فرنساوي مثلا" يبقي لو قلتله نفس الكلمة بالفرنساوي هيفهمها....بس اساسه هو الانجليزي..

نفس الحال بالنسبة للـ BROWSER

اللي هو صفحة الانترنت اكسبلورر اللي فاتحة قدامك....هي في البداية بتفتح بيضة"فاضية"...

الكلام والمعلومات اللي فيها بتظهر ازاي؟؟؟

ذكرنا قبل كده ان السيرفر بيقوم بارسال المعلومات إلي جهازك فيستقبلها البراوزر...

فبما ان ال BROWSER هو اللي بيستقبل المعلومات يبقي السيرفر لازم يبعتله المعلومات دي باللغة اللي هو بيفهما عشان يظهرها قدامنا...لو بعتله نفس الكلام باي اسلوب تاني مش هيعبره :)

فال Browser زيه زي اي انسان ليه لغات بيفهمها ولو قلتله اي حاجة باللغات دي بينفذها فورا....بس هو احسن من الانسان في ان هو بيفهم لغات كتير...وكمان لو قلتله اي حاجة وفهمها بينفذها علطول ;)

اول وابسط لغة من اللغات اللي بيفهمها البراوزر هي لغة الـHTML

وهناك لغات اخري كثيرة اكثر تطور من ال HTML بس الاساس هو ال HTML زي الإنجليزي بالنسبة للشخص الأمريكي...

ولا يوجد اي موقع يخلو من لغة ال HTML ..بالرغم من انها اقل اللغات تطورا...

وفي برامج حاليا بتغني عن لغة ال HTML وبتقوم بكل وظائفها بصورة اسهل اشهرها

" FRONT PAGE ,DREAMWEAVER" ولكن...

اللي ناوي ياخد HTML ويقف علي كده يبقي احسنله يدرس البرامج دي لانها اسهل منه...انما اللي عايز يحترف ويبقي فاهم هو بيعمل ايه اولا...وكمان عايز يتقدم ويدرس لغات تانية بعد كده ويكمل في الطريق يبقي لازم يعرف HTML الاول......

طيب دلوقتي احنا قلنا ان السيرفر بيبعت المعلومات للاجهزة باللغة دي...طب واحنا مالنا ؟؟..

ماحنا بنشوف المعلومات جاهزة وخلاص هنتعب نفسنا ليه؟؟ :rolleyes:

وده لاننا عايزين نصمم مواقع ..يعني احنا اللي هنعمل الصفحة ونحطها علي السيرفر يبقي لازم نحطها باللغة دي لان السيرفر مش هيعمل اي حاجة غير انه هيبعتها ..فلازم نكون حاططينها عليه بلغة يفهما البراوزر لما يبعتهاله....

واي استفسار او نقطة مش واضحة تحت امركو ياشباب

بداية ممتازة للموضوع الهدف منه التسلسل من البداية .. بارك الله فيك .. و ارجوا ان يكون هذا مشروع مرجع متكامل :)

بنت اليمن ،،

بداية موفقة إن شاء الله ولكن لي ملاحظتين

الأولى :

لو تستخدم الوان مختلفة أخي للعناصر الرئيسية يكون افضل أي نعم ستكون متعبة بعض الشيئ ولكن ستجعل الموضوع أكثر تنسيقا وكله في موازين الحسنات يا سيدي

الثانية :

لو المشرفين إن شاء الله يثبتو الموضوع يكون خطوة جيدة

دعائي لك بالتوفيق أخي webdesigner

أخوك ناصر

جزاكما الله خيرا ...

و انا تحت امرك ياسيدي ... نستخدم الوان مختلفة ... ولا يهمك

وانا اتمني تثبيت الموضوع فعلا

بقي العضو abulames لسه لم يقرا الدروس ..

اتمني انه يجي ولقراها قبل محط الدرس التالت

-09

تم تثبيت الموضوع

===

لكم جزيل الشكر علي هذا المتابعة والتغطية السريعة

الدرس الثالث :

الاول نعرف ايه معني الكلمة دي وليه سموها كده

مش معقول اول ماخترعوا اللغة دي قالوا نسميها html؟؟؟

أكيد في سبب ...

html اختصار لهذه الجملة:

hyper text markup language

يعني لغة تقدر بيها تحط علي الانترنت texts بكميات كبيرة (hyper)

وكلمة mark up لان اللغة كلها عبارة عن تعليمات (markings)

نبدأ نعرف ازاي نعرف البراوزر المعلومات باللغة دي …

إحنا قلنا ان دي لغة البراوزر وده يترتب عليه إن أنا لو جيت علي أي فايل عندي علي الجهاز وعملت له rename وغيرت امتداده خليته .html يتحول البرنامج اللي بيشغله الي الانترنت اكسبلورر…بمعني:

انا عندي فايل اسمه مثلا : mostafa.txt وعليه كلام مكتوب بأي محرر كتابة زي ال notepad""

لو انا قلتله rename وخليت اسمه mostafa.html هتلاقي شكله اتحول الي صفحة انترنت اكسبلورر واللي هيفتحه هو الانترنت اكسبلورر..

لان انا كده قلتله ان الكلام اللي عندك هنا مكتوب بلغة html فالجهاز هيحوله تلقائيا الي البرنامج اللي بيفهم اللغة دي وهو يتعامل معاه..اذا لقاه فعلا باللغة دي هيفهمه ..اذا لقاه مش بيها مش هيفهم فيه حاجة …

اقصد اقول من الكلام اللي فات ان اللي احنا بنعمله عشان نكتب صفحة بالاتش تي ام ال بنفتح صفحة أي محرر كتابي زي النوتباد مثلا ونكتب فيها الكلام اللي احنا عاوزينه باللغة اللي هنتعلمها وبعدين نحول امتداده الي .html هيروح البراوزر فاتحه وقاريه….

ان شاء الله الكلام ده هيوضح اكتر بعدين…

الجملة الأخيرة دي ليا عليها تعليقين:

محررات الكتابة المتوفرة كتير وابسطها واسهلها هو ال notepad وهو ده اللي هنتسعمله..

التعليق التاني انهم عملولنا حاجة بسيطة للتلخيص ..بدل متخلي الامتداد .html ممكن تخليه .htm بس من غير حرف ال " l " ..ال يعني الحرف ده اللي كان فارق معاهم :rolleyes:

خلاصة كل اللي فات..

اقف في أي حتة فاضية في الشاشة واضغط كليك يمين..

واختار new واختارمنها text doccument …

هيفتحلك صفحة تكتب فيها الموضوع بتاع سيادتك..

ازاي بقي بتكبتب الموضوع بتاع سيادتك.؟؟؟؟

ناخد دلوقتي نبذة بسيطة عن الشكل العام اللي بتكون عليه اللغة دي…

اللغة دي عبارة عن عدة اوامر كل امر بينفذ حاجة…اوعي تقلق وتقول هو انا هقعد احفظ اوامر بقي..انت مش هتحفظ حاجة خالص..انت بس هتكتب الاوامر دي عندك في ورقة وكل متحب تعمل حاجة تبص في الورقة دي تشوف ايه الامر اللي بيعملها وتكتبه…

يعني مثلا لو انا بعمل موقع بسيط اوي فيه شوية كلام وصورة جنبه بس كده…

هقولله الامر اللي بيفهمه اني هحط صورة…وبعدين احطها ..

وعشان احط الكلام مش محتاج أي امر… يعني هو بيفهم أي حاجة مكتوبة علي انها كلام مالم يذكر غير ذلك..

يعني هو بيمشي يترجم الكلام المكتوب وينقله في صفحة الموقع زي ماهو مكتوب بالظبط كلام عادي…

لو لقي في طريقه امر بيقول له اعمل حاجة معينة بيبطل ينقل الكلام المكتوب ويبدأ ينفذ الأمر ده …

طيب دلوقتي احنا هنكتبله الكلام وهنكتبله الاوامر…ازاي هيعرف ان ده كلام عادي عايزه يظهر وان ده امر بحطه لتنفيذ شئ معين؟؟؟

للتفريق بين الكلام والاوامر بنحط الامر بين علامة اكبر من واصغر من <…….>

هو اول ميشوف العلامتين دول بيعرف ان المكتوب في وسطهم امر هينفذه ….

طيب...

انا لما اقولله امر واكتبه مبين < > مثلا بقول له يغير لون شوية كلام ف الصفحة .. يبقي لازم اقول له فين اخره…منا لو سبتهاله كده هيغير لون الكلام ف الصفحة كلها لاني مقلتلوش يقف ..

يعني انا بقول له غير لون الكلام اللي جاي ... وابدا اكتب الكلام وبعدين أقول له بس كده خلاص بعد نهاية الكلام

بقولله كده ازاي؟؟؟

بكتب نفس الامر بس بالمنظر ده

</ .....>

يعني بزود العلامة دي / (سلاش) قبل اسم الامر بيفهم هو ان المطلوب تنفيذ الامر لغاية هنا فقط …

والكلام ده عام لاي امر مش بس لتغيير لون الكلام ...

طيب المنظر العام للصفحة؟؟؟

احنا عرفنا ان في لغات كتير بيفهمها البراوزر يبقي اول حاجة لازم اعرفهاله ان انا بكتب بلغة ال html ..يبقي في عندنا أمر بيتكتب في اول الصفحة بيعرفه ان انا بكتب html

الامر ده صيغته :

<html>

وبما اننا ذكرنا ان ايامر بيتقل بعد منخلص كل اللي عايزينه بيه ...

يبقي الامر ده بيتقفل فين؟؟؟؟؟؟

بيتقفل اخر حاجة خالص في الصفحة بعد منكتب كل للي احنا عاوزينه في النص بالمنظر ده:

<html>
…………
……………
</html>

بعد معرفته اني هكتب html ، هيا بنا نتعرف علي شكل صفحة ال html عموما

بتتقسم صفحة ال html الي جزأين

head و body

ال head بكتب فيه شوية كلام مش هيظهر في الصفحة زي عنوان الصفحة مثلا وشوية حاجات تانية هنعرفها في وقتها ان شاء الله

ال body بكتب فيه الكلام اللي هيظهر في الصفحة …فلازم اعرفه انا بكتب head ولا body ازاي؟؟

برده في امر بيفهمه الكلام ده…وكل واحد منهم امره بنفس اسمه….

يعني لما احب اعرفه اني هكتب head الامر شكله كده:

<head>…………………</head>

لما احب اعرفه اني هكتب body الامر شكله كده

<body>…………….</body>

ملحوظة :

التقسيمة دي لن تظهر في الصفحة ...هي فقط لك انت كمصمم للموقع ..عشان كل جزءبتكتب فيه حاجات معينة هنعرفها ف وقتها ان شاء الله ... ولكن لن تجد الصفحة مقسمة فسمين !!!!

يبقي الملخص الشكل العام:

هتفتح صفحة notepad

وتكتب فيها

<html>

<head>

.........

</head>

<body>

…………

</body>

</html>

عشان تجرب الكلام ده اكتب نفس المنظر العام اللي انا كاتبه واكتب بين ال body وإغلاقها أي كلام يعجب "بياناتك مثلا"

وبعدين اقفل الصفحة وقولله save واطلع قولله rename وغير امتدادها خليها .html وبعدين افتحها…

هتلاقي الكلام اللي أنت كتبته ظهر والأوامر طبعا مش ظاهرة..هو بس فهم منها هو هيعمل ايه…

--

هنا قد تقابلك مشكلة... انه لا يظهر عندك امتداد للملف notebad وفي هذه الحالة اذا قمت بتغيير الامتداد الي دوت html لن تتحول الصفحة الي صفحة اكسبلورر !!! والسبب في ذلك هو الاتي :

فى حاله مافيش امتداد يبقى فى خاصية فى الويندوز معمولة اسمها "hide the extension" يعني هو مش بيكتب امتداد اي ملف خالص بس هو عارفه ومخزنه ولا يظهره ...معني الكلام ده ان اي حاجة مكتوبة وظاهرة تعتبر من الاسم..حتي لو خليتيها .htm هيعتبرها برده جزء من الاسم انما الامتداد هو مخبيه زي ماهو .txt ...

اذن لابد ان نلغي هذه الخاصية اولا حتي نتمكن من تحويل الامتداد ...

ولالغائها تتبع الخطوات الاتية :

اذا كنت تستخدم وينوز 98 :

افتح my computer

واختر من القائمة العلوية علي الشمال view واختر منها اخر اختيار folder options

هيتفحلك نافذة تختار منها من فوق view

هيطلعلك اختيارات كتييييييييير...

ابحث فيهم لتجد هذا الاختيار :

hide file extention for known file types

اتاكد انه مش متعلم جنبه.....

لو لقيته متعلم جنبه الغي العلامة دي واعمل ok واطلع هتلاقي المشكلة دي راحت خالص ان شاء الله....

تقدر دلوقتي تغير الامتداد براحتك

واذا كنت تستخدم وينوز اكس بي :

افتح my computer

واختر من القائمة العلوية علي اليسار tools واختر منها folder options ... واكمل الخطوات مثل ويندوز 98

بسم الله الرحمن الرحيم

عزيزيwebdesigner

اشكرك الشكر الجزيل على هذه المساهمة وانا من فترة ابحث عن هذه الدروس التي تبدا من البداية حيث انني اصمم موقعا وتواجهني فيه الكثير من المشاكل بسبب عدم الدراية الكافية وعدم التخصص ولكن ارجو منك ان لا تطيل علينا في الدروس القادمة

;)

يعطيكوا العافيه ...

موضوع أكثر من رائع ...

ننتظر المزيد ...

شكرا لكما ...

وان شاء الله الدرس الجديد هحطه انهاردة اول مارجع من الكلية

اخي kn7stan :

هل تقصد انالدروس طويلة ؟؟ام تقصد لا اطيل ف الوقت بين الدرس والدرس ؟؟

الدرس الرابع

قبل ما اكتب أي حاجة…

متنفذش أي حاجة من الكلام ده عملي الا لما تخلص قراءة الموضوع كله للاخر خالص ..

ابقي ارجع اقراه مرة تانية ونفذه عملي وانت بتقراها…وان شاء الله في المرة التانية وبالتفيذ العملي كل حاجة هتبقي سهلة اوي..

اتفقنا ان الصفحة اللي هكتبها بلغة الي html بتنقسم الي جزاين: head و body

وقلنا ان ده مش هيظهر في الموقع بعد منخلص..يعني دي بس تقسيمة بعملها وانا بكتب الموقع او بصممه..انما في الاخر اللي هيظهر بس هو الموجود داخل البودي

ناخد بعض الاوامر اللي هتساعدنا في عمل موقع بسيط المرة دي…

وهنبدا الاول بالهيد:

انا قلت ان الهيد بيتكتب فيه العنوان وكمان شوية حاجات …

هناخد دلوقتي ازاي بنكتب العنوان..والحاجات التانية دي هنبقي ناخدها اخر حاجة خالص ان شاء الله لانها ملهاش اهمية دلوقتي خالص ومش هتتفهم الا في الاخر….

-الامر اللي بيفهم البراوزر اني بكتب عنوان

<title>………………….</title>

وطبعا لازم يكون مكتوب في الهيد مش في البودي..

<html>
<head>
<title>
بسم الله الرحمن الرحيم
</title>
</head>

….

قبل مندخل في اوامر البودي……

كده لاحظنا من الامر اللي فات ده طريقة اغلاق الامر…

بقفل الامر لما اخلص كل اللي انا عايز اكتبه فيه…يعني انا فتحت الهيد وفتحت جواها ال title ولما خلصت كتابة قفلت ال title الاول وبعدين قفلت الهيد

وهيه دي طريقة الاغلاق:- اخر حاجة بتتقفل الاول ..وبعدين اللي قبلها وهكذا لغاية منوصل لاول حاجة…كالتالي:

<html>
<head>
<title>
……….
</title>
</head>
<body>
………..
</body>
</html>

كده خدنا من اوامر الهيد ازاي نحط عنوان للصفحة وبقية اوامر الهيد قلنا في الاخر ان شاء الله…

جرب كده تعمل العنوان ده هتلاقيه بقي مكتوب فوق خالص في السطر الازرق اعلي حاجة في الصفحة…

البودي…

الاول ناخد الصيغة العامة لاي امر في ال html

هيزيد عليها حاجة بسيطة عن اللي عرفناه قبل كده…

أي أمر بيتكتب بالصورة دي:

>خصائصه الامر <

ايه التخريف ده؟؟؟

عشان اوضح الكلام ده هناخد الامر <body> مثال…

احنا قلنا ان انا لما بكتب <body> كده عرفته أني هكتب كلام في البودي…

طب لو انا عايز حاجات معينة او خصائص عامة تظهر في البودي كله زي مثلا لون الخلفية او لون الكلام وكده ة يعني…؟؟

دي بكتبهاله جنب البودي داخل علامة ال < >

طبعا مش أي خصائص بمزاجك ولا بتكتبها بالشكل اللي يعجبك…

الخصائص اللي بتكتبها مع كل امر متحددة ومتحدد الطريقة الي هتكتبها بيها…

يبقي احنا أي امر هناخده ان شاء الله هناخد الاول اسم الأمر وبعدين الخصائص بتاعته…

الامر <html> ملوش خصائص..

وكذلك الامر <head>

وايضا ال <title>

الامر <body> خصائصه:

عشان احدد لون الخلفية ..بكتب بالمنظر ده:

<body bgcolor="black">

قبل ماقول بقية خصائص البودي هوضح من الشكل اللي فات شوية حاجات…

body ده اسم الامر…

bgcolor دي اختصار لbackgroundcolor ودي واحدة من الخواص بتاعته …

واسمها attribute للامر ده…

كل امر له عدة attributes كل واحد منها بينفذ خاصية من الخواص بتاعة الامر ده….

وطبعا انا مش لازم كل ماكتب امر اكتب كل خواصه….هكتب منها بس اللي انا عايزه…

ولو مش عايز اكتبها خالص عادي ممكن اكتب بس اسم الامر هينفذه من غير أي خصائص

تاني حاجة بص كده علي ال attribute ده انا كتبته ازاي

bgcolor="...."

وده شكل أي attribute في الدنيا ..

بكتب اسمه وبعدين علامة = وبعدين بفتح "…" ودي shift مع حرف ال ط

وبكتب فيها قيمة او كلمة علي حسب ال attribute ده …..القيمة او الكلمة دي سمها بشكل عام ال value

يبقي الصيغة العامة لاي امر :

<command name attribute="value" attribute="value" attribute="value">
……………
</comandname>

طبعا مش بالشكل ده…بنكتب اسامي ال attributes وقيمة ال values بس ده الشكل العام

…وكمثال..

<body bgcolor="red">

نرجع للبودي…

خدنا كده من ال attributes بتاعته :

bgcolor

ملحوظة: وانت بتكتب أي attribute متعملشي أي مسافة في وسطه يعني مش بالشكل ده :- bg color …

لا بتبقي كلها علي بعضها كلمة واحدة bgcolor وده في كل ال attributes…

بس بنفصل بين أي attribute واللي بعده بمسافة وكذلك بين الامر وال attribute بمسافة…

<body bgcolor="red">

او أي لون يعجبك يعني….انا طولت شوية وانا بتكلم عن ال attribute ده عشان بس كنت بوضح فيه بعض المفاهيم…

..بس الباقي ان شاء الله هنقول الامر وبعدين الattribute وبعدين ال value علطول ان شاء الله

تاني attribute في البودي:

عشان احدد لون الكلام …بنستخدم الاتربيوت text

<body bgcolor="black" text="white">

او أي لون…

كده يطلع لون الخلفية اسود واي كلام هكتبه في البودي هيطلع لونه ابيض..

فاضل كمان اتنين attributes في البودي… بس بلاش دلوقتي…بعدين ان شاء الله عشان هما مترتبين علي شوية حاجاة في البودي لازم نعرفها الاول ……

كده خلاص المرة دي…يلا اطلع اقرا الكلام تاني ونفذ بقي……ومستني النتايج…

ملحوظة: وانت بتنفذ ..لما تجرب امر منهم وبعدين تعمل rename وتشوف النتيجة…

وبعدين لو عايز تجرب امر تاني هتعمل ايه؟؟

مش معقول كل مرة هتطلع تعيد نفس الموضوع من الاول تاني عشان تجربه…

انت جرب اول حاجة وبعد متعملها وتعملrename وتشوف النتيجة ..

الصفحة اللي ظهرت فيها النتيجة دي……اقف في أي حتة فيها واضغط كليك يمين واختار منها

view source

هتلاقي الصفحة دي لسة مفتوحة وفتحلك فوقها صفحة ال notepad الي انت كنت عاملها ….

غير فيها زي ميعجبك واكتب أي امر جديد… وبعدين اقفلها وقولله save

…كل ده والصفحة اللي فيها النتيجة هتلاقيها لسة مفتوحة متقفلتش…بس الكلام فيها هتلاقيه متغيرش خالص……

اعمل فيها refresh من فوق خالص هتلاقي التعديلات اللي انت عملتها ظهرت فيها ..

وكده بقي كل متحب تزود اي أمر أو تكون كتبت أمر ملقتش نتيجته ظهرت… ده معناه انك كاتب حاجة غلط في الامر ده…قد يكون غلط في ال spelling مثلا تعمل الطريقة دي وتبص عليه تشوف ايه الغلط فيه وتعدله …وتعمل save

وبعدين refresh

وتشوف النتيجة….

يارب يكون الدرس مش صعب ودمه مش تقيل

وياريت ياجماعة اللي يلاقي الموضوع مشي معاه سهل من غير مشاكل يجرب كمان مرتين او تلاتة عشان ايده تاخد علي الكلام ده ويبقي بالنسبة له سهل مفيهوش أي مشاكل…

واللي يلاقي فيه صعوبة يخلي عنده اصرار علي التعلم..يعدي الكلمة الصعبة ويجرب يعمل الباقي وفي الاخر يبقي يبص عليها..ولو معرفش يسال في الكلمة الغامضة بالنسبة له….

عشان تجرب كل الكلام اللي انا قلته دلوقتي…

<html>
<head>
<title>
بسم الله الرحمن الرحيم
</title>
</head>
<body bgcolor="black" text="white">
واكتب هنا الي يعجبك
</body>
</html>

وكده اللي خدناه المرة دي لو اتفهم كويس هتلاقيه قليل جدااااااااااااااا…

ارجوا ان يكون هذا مشروع مرجع متكامل

أيضا..

السلام عليكم

ياجماعه ممكن تقبلونى عضوه جديده معاكم

انا عايزه اقولكم انى فى رابعه حاسبات ومعلومات وعندى مشكله كبيره جداااااااااااااا

انا مشروع التخرج بتاعى تصميم موقع للتوظيف وانا حاسه الموضوع بالنسبه ليا كتير صعب

فلو سمحتو لو يقدر حد يساعدنى

ويبقى شكرا ليه قوووووووووووى

وجزاكم الله كل خير

أنا من تلاميذ هذا الفصل

بارك الله فيكم

اهلا بيكوو كلكو

عزيزي webdesigner

الف شكر لك ولكني قصدت عدم الاطالة بين الدرس والاخر

ولك جزيل الشكر

;)